What's New      
Sensex 2.79- 0.25 %
Nifty 98.40 - 0.17%
UK Pound : 71.58
US Dollar : 44.59
President Obama's Re-election
President Obama's Re-election
Home Poetry Urdu Allama Iqbal Jawab E Shikwa By Allama Iqbal

Jawab E Shikwa By Allama Iqbal

Dil se jo baat nikalti hai, asar rakhti hai,
Par nahin, taaqat-e-parwaaz magar rakhti hai

Qudsi-ul-asal hai, rif'at pe nazar rakhti hai,
Khaak se uthti hai, gardoon pe guzar rakhti hai

Ishq tha fitna gar-o-sarkash-o-chalaak mera,
Aasman cheer gaya nala-e-bebaak mera

Peer-e-gardoon ne kaha sun ke, kahin hai koi!
Bole sayyaare, sar-e-arsh-e-bareen hai koi!

Chaand kahta tha, nahin, ahl-e-zamin hai koi!
Kahkashaan kahti thi, poshida yahin hai koi!

Kuchh jo samjha mere shikwe ko to Rizwan samjha,
Mujhe jannat se nikala hua insaan samjha

Thi farishton ko bhi hairat, ke yeh aawaaz hai kya?
Arsh waalon pe bhi khulta nahin yeh raaz hai kya?

Taa sar-e-arsh bhi insaan ki tag-o-taaz hai kya?
Aa gai khak ki chutki ko bhi parwaaz hai kya?

Ghaafil aadaab se yeh sukkaan-e-zameen kaise hain,
Shokh-o-gustaakh yeh pasti ke makin kaise hain

Is qadar shookh ke Allah se bhi barham hai,
Tha jo masjud-e-malaik yeh wohi Aadam hai?

Aalam-e kaif hai, dana-e-rumuz-e-kam hai,
Haan, magar ijaz ke asrar se namahram hai.

Naaz hai taaqat-e-guftaar pe insaanon ko,
Baat karne ka saliqa nahin nadaanon ko!

Aai aawaaz ghum-angez hai afsana tera,
Ashk-e-betaab se labrez hai paimana tera.

Aasman geer huva Na'ra-e-Mastana tera
Kis qadar shook hai Dil-e-Deewana tera

Shukr shikwe ko kiya husn-e-ada se tu ne,
Hum-sukhan kar diya bandon ko khuda se tu ne

Hum tau mayal-ba-karam hain, koi sayal hi nahin,
Rah dikhlain kise? rahraw-e-manzil hi nahin

Tarbiat aam tau hai, jauhar-e-qabil hi nahin,
Jis se taamir ho aadam ki yeh who gil hi nahin.

Koi qabil ho tau hum shan-e-kai dete hain;
Dhoondne waalon ko duniya bhi nai dete hain!

Haath be-zor hain, ilhaad se dil khoo-gar hain,
Ummati baais-e-ruswai-e-paighamber hain

But-shikan uth gaye, baaqi jo rahe but-gar hain,
Tha Brahim pidar, aur pisar Aazar hain

Bada aasham naye, baada naya, khum bhi naye,
Harm-e-Kaaba naya, But bhi naye, tum bhi naye

Who bhi din the ke yehi maya-e-ra'nai tha,
Naazish-e-mausam-e-gul lala-e-sahraai tha!

Jo Musalmaan tha Allah ka shaidai tha,
Kabhi mehboob tumhara yahi harjaai tha

kisi Ek-jaai se ab Ahd-e Ghulami karlo
Millat-e-Ahmad-e Mursal ko Muqaami karlo

Kis qadar tum pe giran subh ki bedaari hai
Hum se kab pyar hai, haan neend tumhen pyari hai

Taba'e aazad pe qaid-e-Ramazan bhari hai
Tum hi kah do kya yahi aaen-e-vafa dari hai?

Qaum Mazhab se hai, Mazhab jo nahi tum bhi nahin
Jazb-e-baaham jo nahi Mahfil-e-anjum bhi nahin

Jin ko aata nahin Duniya me koi fun, tum ho
Nahin jis qaum ko parwaay-e-Nasheman, tum ho

Bijliyaan jis me ho aasuda, wo Khirman, tum ho
Bech khaate hain jo aslaaf ke madfan, tum ho

Ho niko naam jo Qabron ki tijarat karke
Kya na bechoge jo miljaayen sanam patthar ke ?

Safha-e-dahar se baatil ko mitaya kis ne?
Nau-e-insaan ko ghulami se chhuDaya kis ne?

Mere Ka'be ko jabeenon se basaya kis ne?
Mere Quran ko seenon se lagaya kis ne?

Thhe to aaba who tumhaare hi, magar tum kya ho?
Haath par haath dhare muntazar-e-farda ho!

Kya kaha? "bahr-e-musalmaan hai faqt wa'de-e-hur,"
Shikwa beja bhi kare koi to laazim hai sha'ur!

Adal hai faatir-e-hasti ka azal se dastur,
Muslim aaeen hua kafir tau mile hur-o-qasur;

Tum mein hooron ka koichahne wala hi nahin,
Jalwa-e-tur tau maujood hai, Moosa hi nahin.

Munfiat ek hai is qaum ki, nuqsaan bhi ek,
Ek hi sab ka nabi, deen bhi, eemaan bhi ek,

Haram-e-paak bhi, Allah bhi, Quran bhi ek,
Kuchh baDi baat thi hote jo musalmaan bhi ek!

Firqa bandi hai kahin, aur kahin zaaten hain.
Kya zamane mein panpaneki yehi baaten hain?

Kaun hai Taarik-e-Aain-e-Rasool-e-Mukhtaar?
Maslihat Waqt ki hai kis ke Amal ka Ma'iyar?

Kis ki aankhon me samaya hai Shi'aar-e-Aghyaar?
Ho gayi kis ki nigah Tarz-e-Salaf se Bezaar?

Qalb me Soz nahi, Rooh me Ehsaas nahin
Kuch bhi Paigham-e-Muhammad(SAW) ka tumhen paas nahin

Jaa ke hote hain masaajid mein saf-aara tau gharib,
Zahmat-e-roza jo karte hain gawara tau gharib.

Naam leta hai agar koi hamara, tau gharib,
Pardah rakhta hao agar koi tumhara, tau gharib.

Umra nasha-e-daulat mein hain ghafil hum se,
Zinda hai millat-e-baiza ghurba ke dam se.

Wa'ez-e-Qaum ki wo pukhta khayali na rahi
Barq taba'i na rahi, sho'la maqali na rahi

rah gayi rasm-e-azan rooh-e-bilaali na rahi
falsafa rah gaya, talqeen-e-gazali na rahi

Masjiden marsiya khwan hain ke Namazi na rahe
Ya'ni wo sahab-e-awsaaf-e-Hijaazi na rahe

Shor hai ho gaye duniya se musalmaan naabood,
Hum yeh kahte hain ke the bhi kahin Muslim maujood?

Waza mein tum ho nasaara, to tamuddan mein Hanood,
Yeh musalmaan hain? Jinhen dekh ke sharmain Yahud!

Yun to sayyad bhi ho mirza bhi ho afghan bhi ho
Tum sabhi kuch ho, batao to musalmaan bhi ho?

Dam-e-taqreer thi muslim ki sadaqat bebaak
Adal is ka tha Qawi, laus-e-mara'at se paak

Sahajr-e-fitrat-e-muslim tha haya se namnaak
Tha shuja'at me wo ek Hasti-e-fauqul idraak

Khud gudaazi nam-e-kaifiat sahbayash buad
khali az khuwesh shudan surat-e-Meenaish buad

Har musalmaan rag-e-baatil ke liye nashtar tha
Is ke aaina-e-hasti me Amal jauhar tha

Jo bharosa tha ise quwwat-e-baazu par tha
hai tumhen maut ka dar, usko Khuda ka dar tha

Baap ka ilm na bete ko agar azbar ho,
Phir pisar qabil-e-miraas-e-pidar kyonkar ho?

Har koi mast-e-mai-e-zauq-e-tan aasaani hai,
Tum musalmaan ho? Yeh andaaz-e-musalmaani hai?

Haidari Faqr hai, ne daulat-e-Usmaani hai
Tum ko aslaaf se kya nisbat-e-Ruhaani hai?

wo zamaane me Mu'azziz the Musalmaan ho kar
Aur tum  khwar huve taarik-e-Quraan ho kar

Tum  ho aapas me ghazabnaak, wo aapas me rahim
Tum khatakaar-o-khata been, wo khata posh o karim

Chaahte sab hain ke hon auj-e-surayya pe muqeem,
Pahle waisa koi paida tau kare qalb-e-salim!

Takht-e-Faghfoor bhi un ka tha, sareere ke bhi
yun hi baaten hain tum me ke wo hamiyyat hai bhi?

Khud kushi Shewa tumhara wo Ghuyur-o-Khuddar
Tum ukhuwwat se gurezan, wo ukhuwwat pe nisar

Tum ho Guftaar sarapa, wo sarapa Kirdar
Tum taraste ho kali ko wo gulistaan bakinar

Ab talak yaad hai Qaumon ko hikayat unki
Naqsh hai safha-e-hasti pe sadaqat unki

Misl-e-Anjum ufaq-eQaum pe raushan bhi huve
But-e-hindi ki muhabbat me Birahman bhi huve

Shauq-e-parwaaz me mahjoor-enasheman bhi huve
Be amal the hi jawan, deen se badzan bhi huve

Unko tahzeeb ne har band se aazad kiya
Laake ka'abe se sanam khaane me aabad kiya

Qais zahmat kash-e-tanhaai-e-sahra na rahe
Shahar ki hawa khaaye baday-e-paimaana rahe

wo to deewana hai, basti me rahe ya na rahe
Ye zaruri hai, rukh-e-hijaab-e-laila na rahe

Gila jor na ho, shikwa bedar na ho
Ishq aazad hai, kyun husn bhi aazad na ho?

Ahd-e-nau barq hai, aatish zan-e-har khirman hai,
Aiman is se koi sahra no koi gulshan hai.

Is nai aag ka aqwaam-e-kuhan eendhan hai,
Millat-e-khatam-e-rusul shoula ba parahan hai.

Aaj bhi ho jo baraheem ka eeman paida
aag karsakti hai andaaz-e-gulistaan paida

Dekh kar range-e-chaman ho na pareshan maali,
Kookab-e-ghuncha se shaakhen hain chamakne wali,

Khas-o-khashaak se hota hai gulistan khaali,
Gul bar andaaz hai khun-e-shuhda ki laali.

Rang gardoon ka zara dekh tau unnabi hai,
Yeh nikalte hue suraj ki ufaq taabi hai.

Ummaten gulshan-e-hasti me samar cheeda bhi hain
Aur Mahrum-e-samar bhi hain, khizaan deeda bhi hain

Sainkdon nakhl hain, kaaheeda bhi hain, baaleeda bhi hain
Sainkdon batan-e-chaman me abhi posheeda bhi hain

Nakhl-e-Islam namoona hai bro-mandi ka,
Phal hai yeh sainkron saalon ki chaman bandi ka.

Paak hai gard-watan se sardaaman tera
Tu wo Yusuf hai ke har Misr hai Kan'an tera

Qaafila ho na sakega kabhi weeran tera,
Ghair yak baang-e-dara kuchh nahin samaan tera.

Nakhl-e-shama asti-o-dar should dood resha-e-tu,
Aaqbat soz bood saya-e-andesha-e-tu.

Tu na mit jaayega Iran ke mit jaane se
Nasha-eMai ko Ta'alluq nahi paimaane se

Hai Ayan yurish-e-tatar ke afsaane se
Paasbaan mil gaye ka'be ko sanam khaane se

Kashti-e-Haq ka zamaane me sahara tu hai
Asr-e-Nauraat hai, Dhundla sa sitara tu hai

Hai jo hangaama bapa Yurish-e-Balghaari ka
Ghaafilon ke liye paigham hai Bedaari ka

Tu ye samajhta hai, ye saaman hai Dil aazari ka?
Imtehaan hai tere eesar ka, Khuddari ka

Kyun harasan hai Saheel-e-Faras-e-A'da se
Noor-e-Haq bujh na sakega Nafas-e-A'da se

Chasm-e-Aqwaam se Makhfi hai abhi haqeeqat teri
Hai abhi Mahfil-e-Hasti ko Zarurat teri

Zinda rakhti hai Zamaane ko Hararat teri
Kaukab-e-Qismat-e-Imkaan hai Khilafat teri

Waqt-e-Fursat kahan hai, kaam abhi baaqi hai
Noor-e-Tauheed ka itmaam abhi baaqi hai

Misl-e-Bu qaid hai Gunche me pareshan hoja
Rukht bardosh hawa-e-chamanistaan hoja

Hai tunk maya tu zarre se bayaban hoja
Naghma-e-Mauj se hangaama-e-tufaan hoja

Quwwat-e-Ishq se har past ko baala karde
Dahar me Ism-e-Muhammad se Ujaala karde

Ho na ye phul to bulbul ka tarannum bhi na ho
chaman-e-dahar me kaliyon ka tabassum bhi na ho

Ye na saaqi ho to mai bhi na ho khum bhi na ho
Bazm-e-tauheed bahi duniya me na ho tum bhi na ho

Kheema-e-aflaak ka estaada isi naam hai
Nabz-e-hasti tapish aamada isi naam se hai

Dasht mein, daaman-e-kohsaar mein maidaan me hai
Bahar mein mauj ki aagosh mein tufaan mein hai

Cheen ke sahahar Maraqash ke bayaban mein hai
Aur posheeda musalmaan ke Imaan mein hai

Chashm-e-Aqwaam ye nazaara abad tak dekhe
Rif'at-e-Shaan-e-Rafa'na laka zikrak dekhe

Mardum-e-Chashm-e-Zamin yaani wo kaali duniya
Wo tumhaare Shohada paalne waali duinya

Garmi mahar ki parvarda hilaali duniya
Ishq waale jise kahte hain bilaali duniya

tapish andoz hai is naam se paare ki tarah
Gauta zan noor mein hai aank taare ki tarah

Aqal hai teri sipar Ishq hai shamsheer teri
Mere darwesh Khilafat hai jahangeer teri

Masiwa Allah ke liye aag hai takbeer teri
Tu musalmaan hai to Taqdeer hai tadbeer teri

Ki Mohammed se wafa tu ne to hum tere hain,
Yeh jahan cheez hai kya, lauh-o-qalam tere hain.
View Reviews
Add Your Reviews/Comments
Name :
Email :
Your Comments :
Verify Code :
   verification image, type it in the box

Submit Your Website


Most Viewed