What's New      
Sensex 2.79- 0.25 %
Nifty 98.40 - 0.17%
UK Pound : 71.58
US Dollar : 44.59
President Obama's Re-election
President Obama's Re-election
Home Poetry Urdu Allama Iqbal Shikwa By Sir Mohammad Allama

Shikwa By Sir Mohammad Allama

Kyon Ziaan kaar banun, sood framosh rahoon? 
Fikr-e-farda na karun, mahw-e-ghum-e-dosh rahoon,  
 
Naale bulbul ke sunoon, aur hama tan gosh rahoon, 
Hamnawa main bhi koi gul hoon ke khamosh rahoon?
 
Jurrat aamoz meri taab-e-sukhan hai mujhko,
Shikwa Allah se khakam badahan hai mujhko
 



Hai baja, Shewa-e-tasleem mein mashhoor hain hum 
Qissa-e-dard sunaate hain ke majboor hain hum
 
saaz-e-Khamoosh hain, Faryaad se Ma'moor hain hum
Naala aata hai agar lab pe to Ma'zuur hain hum
 
Ai Khuda shikwa-e-arbab-e-wafa bhi sun le,
Khu gar-e-hamd se thora sa gila bhi sun le

Thi tau maujood azal se hi teri zaat-e-qadim,
Phool tha zeb-e-chaman, par na pareshan thi shamim
 
Shart insaaf hai, ai, sahib-e-altaf-e-ameem,
Boo-e-gul phailti kis tarah jo hoti na naseem? 

Hum ko jamee'at-e-Khatir ye Pareshaani thi
Warna ummat tere mahboob ki Deewaani thi.
 
Hum se pahle tha ajab tere jahan ka manzar,
Kahin masjood the patther, kahin ma'bood shajar,

Khugar-e-paikar-e-mahsoos thi insaan ki nazar,
Maanta phir koi un-dekhe Khuda ko kyonkar?
 
Tujhko maalum hai leta tha koi naam tera?
Quwwat-e-baazoo-e-Muslim ne kiya Kaam tera! 
 
Bas rahe the yahin saljuq bhi, toorani bhi,
Ahl-e-cheen cheen mein, Iran mein sasaani bhi,

Isi ma'moore mein aabad the Yunaani bhi,
Isi duniya mein Yahudi bhi the, Nasraani bhi,

Par tere naam pe talwar uthai kis ne,
Baat jo bigri huri thi who banaai kis ne?  
 
The hameen ek tere ma'rka aaraaon mein!
Khushkion mein kabhi ladte, kabhi dariyaon mein,

Di azaanen kabhi Europe ke kaleesaaon mein,
Kabhi Africa ke tapte hue sahraaon mein.
 
Shaan aankhon mein na jachti thi jahandaaron ki
Kalma padhte the hum chaaon me talwaaron ki
 
Hum jo jeete the to jangon ki museebat ke liye
Aur marte the tere naam ki Azmat ke liye
 
Thi na kuchh teg zani apni hakumat ke lieye,
Sar ba-kaf phirte the kya dahar mein daulat ke lieye? 
 
Qaum apni jo zar-o-maal-e-jahan par marti,
But faroshi ke iwaz but shikani kyon karti?
 
Tal na sakte the agar jung me Ar jaate the
Paaon Sheron ke bhi maidan se ukhad jaate the
 

Tujh se sarkash hua koi to Bigad jaate the
Teg kya cheez hai, hum top se lad jaate the
 
Naqsh tauheed ka har dil pe bithaya hum ne,
Zer-e-khanjar bhi yeh paigham sunaya hum ne.
 
Tu hi kah de ke ukhada dar-e-Khyber kis ne?
Shaher qaiser ka jo tha us ko kiya sar kis ne? 
 
Tode makhluq khudawandon ke paikar kis ne?
Kaat kar rakh diye kuffaar ke lashkar kis ne?
 
Kis ne thanda kiya Aathish kada-e-Iran ko?
kis ne phir Zinda kiya tazkara-eYazdaan ko?
 
Kaunsi qaum faqat teri talabgar huvi?
Aur tere liye zahmate kash-e-paikar huvi
 
Kis ki sahmsheer jahangeer jahandaar huvi?
Kis ki takbeer se duniya teri Bedaar huvi?
 
Kis ki haibat se sanam Sahame huve rahte the?
Munh ke bal gir ke HuwAllahu Ahad kahte the.
 
Aa gaya ain laraai mein agar waqt-e-namaz,
Qibla roo ho ke zamin bos hui qaum-e-Hijaz,
 
Ek hi saf mein khade ho gaye mahmud-o-Ayaz,
No koi banda raha aur no koi banda nawaz. 
 
Banda-o-sahib-o-muhtaaj-o-ghani ek hue,
Teri sarkar mein pahunche tau sabhi ek hue.
 
Mehfil-e-kaun-o-makaan mein sahar-o-shaam phire,
Mai-e-tauheed ko lekar sift-e-jam phire.
 
Koh me dasht me lekar tera paigham phire
Aur malum hai tujh ko, kabhi nakaam phire?
 
Dasht tau dasht hain, darya bhi na chhore hum ne,
Bahr-e-zulmaat mein daura diye ghore hum ne. 
 
Safah-e-dahar se baatil ko mitaya hum ne,
Nau'-e-insaan ko ghulami se chhuraya hum ne,
 
Tere kaabe ko jabeenon se basaya hum ne,
Tere Qur'an ko seenon se lagaya hum ne.
 
Phir bhi hum se yeh gila hai, ke wafadar nahin,
Hum wafadar nahin, tu bhi tau dildar nahin! 
 
Ummatein aur bhi hain, in mein Gunah gaar bhi hain
Ijz waale bhi hain, Mast ma-e-pandaar bhi hain
 
In mein kahel bhi hain, Ghaafil bhi hain, hushiyar bhi hain
Sainkdon hain ke Tere naam se Bezaar bhi hain
 
Rahmaten hain teri aghiyar ke kashaanon par,
Barq girti hai tau bechare Musalmaanon par!
 
But sanam khaanon me kahte hain  ke Musalman gaye
Hai khushi in ko ke, Ka'be ke Nigahbaan gaye
 
Manzil-e-Dahar se oonton ke Hudi Khwan gaye
Apni Baghlon me dabaaye huwe Quraan gaye
 
Khanda zan kufr hai, Ehasaas Tujhe hai ke nahin?
Apni tauheed ka kuch paas tujhe hai ke nahin?
 
Yeh shikait nahin, hain un ke khazane ma'mur,
Nehin mehfil mein jinhen baat bhi karne ka sha'oor,
 
Qahar tau yeh hai ke kafir ko milen hoor-o-qasoor,
Aur bechaare Musalmaan ko faqt waada-e-hoor! 
 
Ab wo altaaf nahi, hum pe inaayat nahin
Baat ye kya hia ke pahli si madaraat nahin?

Kyun musalmaanon mein hai daulat-e-Duniya nayaab
Teri Qudrat to wo hai jis ki had hai na Hisaab

Tu jo chaahe to uthe seena-e-Sahraa se Hubaab
Rahroo-e-Dasht ho Seeli zada-e-Mauj-e-sarab
 
Ta'an-e-aghiyaar hai, ruswai hai, nadaari hai,
Kya tere nam pe marne ka iwaz khwari hai?
 
Bani aghyaar ki ab chahne waali Duniya
Rah gayi apne liye ek Kahayali Duniya
 
Hum to rukhsat huwe, auron ne sambhaali Duniya
Phir na kahna huwi tauheed se khaali Duniya
 
Hum tau jeete hain ke duniya mein tira naam rahe,
Kahin mumkin hai saqi na rahe, jaam rahe?
 

Teri mehfil bhi gai, chahne walw bhi gaye,
Shab ki aahen bhi gaien, subah ke nale bhi gaye, 
 
Dil tujhe de bhi gaye, apna sila le bhi gaye,
Aa ke baithe bhi na the, ke nikaale bhi gaye.

Aaye ushaaq, gaye waada-e-farda lekar,
Ab unhen dhoond chirag-e-rukh-e-zeba lekar!

Dard-e-Laila bhi wohi, Qais ka pahlu bhi wohi,
Nejd ke dasht-o-jabal mein ram-e-aahoo bhi wohi, 
 
Ishq ka dil bhi wohi, husn ka jaadoo bhi wohi,
Ummat-e-Ahmed-e-Mursil bhi wohi, tu bhi wohi,
 
Phir yeh aazurdagi-e-ghair-sabab kya maani,
Apne shaidaaon pe yeh chashm-e-ghazab kya maani?
 
Tujh ko Choda ke Rasool-e-Arabi ko Chhoda?
But gari pesh kiya?, But shikani ko chhoda?
 
Ishq ko, Ishq ki Aashufta sari ko Choda?
Rasm-e-Salmaan-o-Owais-e-Qarani ko Choda?

Aag takbeer ki seenon mein dabi rakhte hain
Zindagi misal-e-Bilaal-e-Habashi Rakhte hain
 
Ishq ki khair, who pehli si ada bhi na sahi,
Jaada paimaai taslim-o-raza bhi na sahi, 
 
Muztarib dil sifat-e-Qibla numa bhi na sahi
Aur Pabandi-e-Aayin-ewafa bhi na sahi
 
Kabhi hum se, kabhi ghairon se shanasaai hai,
Baat kahne ki nahin, tu bhi tau harjaai hai.
 
Sare-faran pe kiya deen ko kaamil tu ne
ek Ishaare me hazaron ke liye dil tu ne
 
Aatish andoz kiya Ishq ka Haasil tu ne
Phunk di Garmi-e-Rukhsaar se mahfil tu ne
 
Aaj kyun seene hamare sharar aabad nahin?
Hum wahi sokhta saman hain, tujhe yaad nahin?
 
Waadi-e-najad me wo shor-e-salasil na raha
Qais deewana-e-Nazzara-e-Mahmil na raha
 
Hausle wo na rahe hum na rahe dil na raha
Ghar ye ujda hai ke tu raunaq-e-Mahfil na raha

Aye KhushAan roz ke aayi wa basad naaz aayai
Be Hijaabana Suu-e-Mahfil-e-Maa baaz aayi
 
Baada kash ghair hian gulshan me lab-e-juu baithe
Sunte hain jaam bakaf, naghma-e-kuku baithe
  
duur hangaama-e-Gulzaar se yeksu baithe
tere deewane bhi hain, muntazar-e-hu baithe
 
Apne parwaanon ko phir Zauq-e-Khud Afrozi de
Barq-e-Derina ko phir farmaan-e-jigar sozi de
 
Qaum-e-aawara inaan taab hai phir suu-e-hijaaz
le uda bubul-e-be par ko mazaq-e-parwaaz
  
Muztarab baagh ke har ghunche me hai buu-e-niyaaz
tuu zara chhed to de, tishna-emizraab hai saaz
 
Naghme betaab hain taaron se nikalne ke liye
tuur muztar hai phir isi aag me jalne ke liye
 
Mushkilen ummat-emarhoom ki aasan karde
mor-e-be-maya ko hamdosh-e-sulaimaan karde
 
jins-e-naayab-e-mohabbat ko arzaan karde
hind ke dair nasheenon ko musalmaan karde
 
Juu-e-khoon mee chakad az hasrat-e-dereena maa
Mee tapad naala ba nashtar kada seena maa

Buu-e-gul le gayi beroon-e-chaman raaz-e-chaman
Kya qayamat hain ke khuud phuul hain gammaz-e-chaman
  
Ahd-e-gul khatam hua, tut gaya saaz-e-chaman,
Ur gaye dalion se zamzama pardaaz-e-chaman.
 
Ek bulbul hai ke hai mahw-e-tarannum ab tak,
Us ke seene mein hai naghmon ka talatam ab tak. 
 
Qumrian shaakh-e-sanober se gurezaan bhi huin,
Pattian phool ki jhar jhar ke pareshan bhi huin;
  
Who purani ravishen bagh ki weeran bhi huin,
Daalian pairahan-e-barg se uriaan bhi huin.
 
Qaid-e-mausam se tabiat rahi aazad uski,
Kaash gulshan mein samjhta koi faryaad uski. 
 
Lutf marne mein hai na maza jeene mein
Kuch maza hai to yehi khoon-e-Jigar peene mein
 
Kitne betaab hain Jauhar mere aaine mein
Kitne jalwe tadapte ahin mere seene mein
 
Is gulistaan me magar dekhne waale hi nahin
Daag jo seene mein rakhte hon wo laale hi nahin
 
Chaak is bulbul-e-tanha ki nawa se dil hon,
Jaagne wale isi baang-e-dara se dil hon.
 
Yaani phir zinda naye ahd-e-wafa se dil hon,
Phir isi bada-e-deereena ke pyaase dil hon.

Ajmy khum hai tau kya, mai tau Hejaazi hai meri,
Naghma Hindi hai tau kya, lai tau Hejaazi hai meri. 

View Reviews
Add Your Reviews/Comments
Name :
Email :
Your Comments :
Verify Code :
   verification image, type it in the box

Submit Your Website


Most Viewed